LAOAG CITY – Insigida a trinatar ti Person’s With Disability Affairs Office ditoy probinsia ti reklamo kontra iti maysa a vlogger iti ili ti Vintar a mangtultulad kadagiti adda ti rangkap ti bagida nangruna kadagiti saan a makangngeg babaen kada Mrs. Carolyn Domingo, Persons With Disability Affairs Officer ken ni Mr. Joseph Audlaumor Pacol, Presidente ti Ilocos Norte Provincial Association of Deaf wenno INPAD.
Daytoy ket kalpasan a naidanon dagiti maseknan nga agrekreklamo ti concern-da.
Naammoan nga apaman a naidanon daytoy a reklamo iti nasao nga opisina ket insigida nga inyuman dagiti maseknan ken ni Mayor Richard De Gala iti nasao nga ili.
Gapu iti daytoy naimbitaran ti nasao a vlogger a ni Jen Mark Mateo a residente iti Barangay 4 iti ili ti Vintar ken ti agrekreklamo iti maysa a komprontasion nga indauloan ti Mayor.
Karaman kadagiti nagatendar iti komprontasion ket isuda Mrs. Domingo manipud iti Persons With Disability Affairs Office iti siudad ti Batac ken Mr. Raymund Medina ken Ms. Domnina Batallones manipud iti Persons With Disability Affairs Office ditoy siudad ti Laoag pakairamanan da Laoag City Social Welfare and Development Officer Mrs. Perlita Cabello, Officer In Charge ti Provincial Social Welfare and Development Officer Rochelle Gajes ken ni Municipal Social Welfare and Development Officer Rachelle Pailma iti ili ti Vintar.
Mainaig iti daytoy, dimmawat ti dispensar ti vlogger iti naaramidna kontra kadagiti addaan ti rangkap nga indibidual.
Inlawlawag ni Mateo a saanna nga ammo nga adda ti nalabsingna a paglintegan kadagiti sumagmamano a vlog-na a panangtuladna kadagiti adda ti rangkap ti bagina.
Inpasingkedna a saannan nga uliten ti inaramidna kagiddan ti pananggutigotna kadagiti dadduma a padana a vlogger a saanda a tultuladen ti inaramidna.
