LAOAG CITY – Tinagbat ti construction worker ti mannalon iti maysa a minatayan iti Sitio 6, Barangay 11 Bulbulala iti ili ti Vintar.
Ti biktima ket adda ti umno a tawen, naasawaan ken residente ti Barangay 12 Namoroc iti ili ti Vintar.
Ti suspek ket agtawen ti 52, addaan ti live-in partner ken residente ti Barangay 11 Bulbulala iti ili ti Vintar.
Ti saksi iti insidente ket adda ti umno a tawen, awanan asawa, mannalon ken residente iti nasao met laeng a barangay.
Basar iti Vintar Municipal Police Station, adda ti nabara nga argumento iti nagbaetan ti biktima ken ti saksi iti pagiinoman iti maysa a minatayan.
Ginandat ti suspek nga anawaen isuda ngem saan nga agpaanawa ti biktima ken kellaat a tinungpana ti saksi iti gapu iti kinabartekna.
Mainaig iti daytoy, kayat ti biktima a dangran ti saksi isu a nagawid ti suspek ken idi nagsublin ket adda ti iggemnan a samurai knife.
Gapu iti daytoy, napan kinomprontar ti suspek ti biktima agingga a tinagtagbatna daytoy iti sumagmamano a daras iti akinkannigid a lapayag, tengnged ken takiag ti biktima.
Naitaray ti biktima iti Piddig District Hospital ngem naiyakar iti Mariano Marcos Memorial Hospital and Medical Center iti siudad ti Batac para iti naan-anay a pannakatamingna.
Naammoan a ti nausar a samurai knife ket ti 80 a sentimetro a narekober iti asideg ti nakapasamakan ti insidente.
Kabayatanna, boluntario a simmuko ti suspek kadagiti otoridad kalpasan ti insidente.
