LAOAG CITY – Simmangpeten dagiti atleta ti Ilocos Norte idiay Bacnotan, La Union para iti Region 1 Athletic Association Meet.
Segun ken ni Mr. Gene Reginaldo, Sports Supervisor ti Department of Education – Schools Division Office of Ilocos Norte, agarup 600 nga umaayam ti nakipaset iti nasao nga sporting event pakairamanan dagiti coach, Department of Education officials ken committee chairperson.
Inbatadna a naiget a maipatungpal ti window hour para kadagiti atleta no sadinno a maipawil nga agay-ayam dagitoy iti nagbaetan iti oras ti alas dies ti bigat agingga iti alas dos ti malem tapno maipasigurado ti kinatalged ti salun-at dagiti umaayam.
Nupay kasta, inlawlawagna a no bilang naulep ti tangatang ken saan a nabara ti panawen ket mabalin nga itultuloy dagiti atleta ti panagay-ayamda kadagiti outdoor activities.
Innayonna a mangnamnamada a maminsan manen nga agballigida kadagiti sports kas ti athletics, wushu, baseball, softball ken dadduma pay.
Maipalagip nga iti napalabas a tawen 2024 ket nagbalin nga host ti Ilocos Norte iti Region 1 Athletic Association Meet.
