LAOAG CITY – Inbilin ni Presidente Ferdinand R. Marcos Jr. ti naiget nga imbestigasyon mainaig iti maipagarop nga insidente ti “tanim-bala” iti Ninoy Aquino International Airport (NAIA), kalpasan a nag-viral ti video a nangparubrub iti panagsubli ti extortion scheme.
Inbatad ni Presidential Communications Undersecretary ken Palace Press Officer Claire Castro a binilinen ni Presidente Marcos ti Department of Transportation (DOTr) partikular ken ni Secretary Vince Dizon a mangiyuswat ti detalyado nga imbestigasyon seknan iti insidente iti Terminal 3 iti Pasay City idi Marso 6 ita a tawen.
Inpetteng ni Castro a saan a napintas no maulit manen ti nasao a pasamak.
Inpaganetget pay ni Castro a saan a kunsintiren ni Presidente Marcos ti nasao nga aramid aglalo no dagiti Pilipino wenno turista ti mabiktima ti airport personnel.
Iti agdama ket agtultuloy paylaeng ti panag-viral ti video a pakabuyaan ti panangsaed dagiti tallo nga empleado iti Office for Transportation Security iti agtawen ti 69 a babai a pasahero gapu iti maipagarop a nadiskubre da a bala nga anting-anting iti bitbit na a bag.
Naamoan a ti babai ket agturong idiay Vietnam kadwa na ti pamilya na idi napasamak ti insidente.
Mangngeg pay iti video iti panagpak-pakaasi ti babai gapu iti amakna a mapanawan ti pagluganan na nga eroplano ngem inpilit dagiti maseknan nga empleado nga ininspeksyon ti bagna , ngem awan ti nakita nga anting-anting a naaramid iti bala ti paltog.
