LAOAG CITY – Inrakurak ti Department of Transportation (DOTr) nga ad-adalen da ti pannakaikkat ti barriers iti expressway ditoy pagilian tapno makissayan ti trapako kadagiti toll plazas ken ti oras ti panagbiahe dagiti motorista.

Basar iti ahensia, kalikagomda ti insigida a pannakaiprayoridad ti multi-lane free-flow system gapu iti potensial a pannakapasayaat ti tollway efficiency, makissayan a konsumo ti gasolina ken pannakakissay ti carbon emissions manipud kadagiti lugan a naka-idle iti toll gates.

Gapu iti daytoy, imbilin ti Department of Transportation (DOTr) dagiti kompania a mangisubmitir ti komprehensibo nga action plan ken readiness assessment iti cashless payment infrastructure iti Toll Regulatory Board agingga Disiembre 21, 2026.

Pakairamanan pay a maisubmitir iti electronic toll collection penetration strategies, imprastraktura ken ti kinaagana dagiti teknolohia, operational ken enforcement protocols, kasta payen dagiti timeline ti pannakayimplementar  daytoy.

Kabayatanna,` binalakadan pay ti ahensia ti pannakaipalawa ti radio frequency identification (RFID) ken electronic toll collection (ETC) installation sites, tapno maintadudo ti digital onboarding, mangidiaya ti promotional incentives, ken pannakaisayangkat dagiti public information campaigns.