LAOAG CITY – Inbatad ni dati nga Executive Secretary Salvador Medialdea nga awan ni dati a Presidente Rodrigo Duterte iti The Hague Penitentiary Institution.
Inlawlawag na nga iti panagturong na iti lugar ket naibaga kenkuana staff nga awan ti agnagan ti Rodrigo Duterte iti pasilidad.
Inpakaammo pay ni Medialdea a saan a bigbigen isuna ti pasilidad kas legal counsel ni Duterte.
Mainaig iti daytoy, kuna ni Medialdea nga immunan a naipasigurado kadakuada a maikabil ni dati a Presidente Duterte iti ospital ngem awan ti naibaga da a nagan.
Inpalgak ni Medialdea nga agpapan ita ket saan pay a naibaga kadakuada ti nagan ti ospital.
Inpaganetget ni Medialdea a paset daytoyen ti plano a panangkidnap iti presidente tapno mairuwar iti Pilipinas, ken napwersa a sumurot uray awa ti visa na nga agturong iti Netherlands.
Inpasingked ni Medialdea nga agsubli da iti International Criminal Court tapno amwen no sadinno ti ayan ni dati a Presidente Duterte.
Innayon na a nakasarita nan ni Vice President Sara Duterte iti telepono nga agur-uray met ti update ngem saanna a masinunuo ti lokasyon na.
Kabayatanna, inpasingked ti International Criminal Court nga adda ni dati a Duterte iti ICC detention center ke itay laeng immuna a gundaway ket kiniddaw na a kasarita na ti consular officer iti Philippine Embassy iti The Netherlands.
Kuna ti International Criminal Court a bayat iti pannakisarita ni Duterte iti consular officer ket inpakaammo na a naipadalan daytoy iti medical check-up ken nakaawat ti medical care.
