LAOAG CITY – Agtultuloy ti panangtingiting ti Maritime Industry Authority wenno MARINA dagiti manarimaan a panagngato ti plete nga inpatungpal dagiti operator ti ferry nga agbiahe nga agturong iti Romblon ken dadduma pay a ruta iti kabaybayan.
Daytoy ket tapno maamoan no maitutop dagitoy iti naikeddeng a limitasion a plete.
Segun ken ni Maritime Industry Authority (MARINA) Region IV Director Maximo Bañares Jr., a tingitingen ti ahensia ti sumagmamano a fare adjustments kabayatan ti nagbalin a reklamo dagiti pasahero.
Innayonna a maipagarup a saan a rumbeng nga aglabes iti 10% ti fare adjustment.
Mainaig iti daytoy, pakdaaranda nga insigida dagiti operators mangipatungpal ti fare increase no daytoy ket saan a maitutop iti permitted level.
Maipalagip a naaddaan ti dakkel a panagbalbaliw iti presyo ti plete manipud Marso ken Abril ita a tawen nga adda pakainaiganna iti rinnupak iti Middle East.
Inpaganetget pay ti ahensia a kasapulan a sumurot pay dagiti ferry operatos a makipada iti panagbaba ti plete inton bumaba met ti presio ti produkto a petrolyo iti merkado.
