Sinuspenso ti Maritime Industry Authority (MARINA) ti Passenger Ship Safety Certificate (PSSC) ti MV Virgen de Peñafrancia II kalpasan daytoy a nagbaliktad iti asideg iti Ungos Port iti Real, Quezon, itay bigat, Oktubre 30.
Gapu iti daytoy, saan pay laeng pinalubusan nga agbiahe ti roll-on/roll-off (RoRo) vessel nga imanmanehar ti Starhorse Shippine Lines Inc. agingga saan pay nalpas ti naiget nga inspeksion ken teknikal a panangtingiting iti kasasaad ken katalgedanna nga agbiahe.
Basar iti Maritime Industry Authority (MARINA), inbilin ni Transportation Secretary Vince Dizon ti suspension ti safety certificate kalpasan a masugatan ti tallo a pasahero iti insidente gapu ta natamaan dagitoy ti maysa a drum a naggaraw idi nagbaliktad ti barko.
Naamoan nga adda lugan a 40 a pasahero, pakairamanan ti 2 a maladaga ken 18 a tripulante ti barko idi napasamak ti insidente kabayatan nga adda iti kaadayo a 10 a metro manipud iti pantalan. Idinto a sinalaknib ti Philippine Coast Guard (PCG) dagiti pasahero ken tripulante.
Basar iti inisial a report, napasamak ti insidente ti oras ti alas-12:25 ti parbangon idi napugsat ti mooring rope a nakatali iti barko iti panatalan gapu iti napigsa panagayos ti danum. Maipagarup a pinadas nga imaniobra ti barko nga agsubli iti pier ngam naipit ti umuna a pasetna daytoy sakbay a nagbaliktad.
Naggapu iti Polillo Island ti barko ken agsagsagana a mangibaba dagiti pasahero idi napasamak ti insidente. Adda pay sakayna daytoy a 14 a behikulo ken sumurok-kumurang 1,300 a litro ti marine diesel iti service tank.
Nupay kasta, nangikabil ti Philippine Coast Guard ti oil spill containment boom iti aglawlaw ti barko kas panagannad konta iti posible a leakage ti langis ken kontaminasion kadagiti kaasideg a komunidad.
Inpaganetget ti MARINA nga inisial a resulta pay laeng ti naduktalan mainaig iti insidente, saan pay a pinal ken agtultuloy ti imbestigastion.
Kabayatanna, inbatad ti Starhorse Shipping Lines a makitintinnulong daytoy iti Philippine Coast Guard manipud idi napasamak ti insidente.
