LAOAG CITY – Kinondenar ti Philippine Coast Guard (PCG) ti nagbalin a panang-harass ti China Coast Guard (CCG) a nangitunda ti pannakatantan iti medical evacuation ti maysa a miembro ti Philippine Navy manipud iti BRP Sierra Madre iti Ayungin Shoal idi Oktubre 8.
Segun ken ni Philippine Coast Guard spokesperson for the West Philippine Sear Rear Admiral Jay Tarriela, umabot iti 10 nga oras sakbay a nalpas ti medical evacuation gapu kadagiti tignay dagiti barko ti China Coast Guard kontra kadagiti barko ti Pilipinas.
Kunana a ti gagangay nga oras ti nadakamat nga operasion ket umabot laeng ti maysa oras.
Mainaig iti daytoy, inawagan ni Tarriela a “barbaric behavior” ti inaramid ti Chinese Coast Guard gapu ta saan panpanunoten dagitoy dagiti biag ken kinatalged ti dadduma nga indibidual no diket nakapukosda laeng iti panagtagikua iti paag-agawan a kabaybayan.
Inpetteng ti opisial a saan a lappedan ti Pilipinas ti aniaman nga operasion iti panagsalaknib wenno panangipaay ti tulong kadagiti dayuhan nga agkasapulan ti tulong iti baybay, aniaman ti nasionalidad.
Inbatadna nga akem ti Coast Guard ti panangtulong kadagiti tao nga adda iti peggad, maiyataday kadagiti internasional a katulagan kas ti International Convention for the Safety of Life at Sea (SOLAS) ken United Nations Convention on the Law of the Sea (UNCLOS).
Inpaganetget ni Tarriela a masapul a saan nga ipangpangruna dagiti banag ti geopolitikal kan ti paag-agawan iti teritorio no naisagut ti salun-at ken biag dagiti sundalo ken mangngalap.
Maipalagip a nilappedan ti China Coast Guard dagiti miembro ti Philippine Coast Guard kabayatan a mangisaysayangkat daytoy ti medical evacuation iti sundalo a Pinoy.
Naamoan a nanagiparuk-at ti water cannon ti barko ti China Coast Guard kabayatan nga umas-asideg ti BRP Cabra iti Ayungin Shoal.
Nupay kasta, saan a natamaan ti danum iti water cannon ti bangko ti Philippine Coast Guard.
