LAOAG CITY – Inpakaammo ni Dr. Samatha Licodene, mangidadaulo ti City Veterinary Office ditoy siudad ti Laoag nga adda ti maisayangkat a libre a Veterinary Medical Mission iti Multi-purpose Hall ditoy siudad inton Marso 21.
Segun ken ni Dr. Licodine, paset daytoy iti tarigagay ti lokal a gobierno a maiyadayo iti sakit dagiti taraken dagiti umili.
Inbatadna a karaman kadagiti maiyuswat ket ti libre a bakuna para ti anti-rabies, deworming, consultations ken ti libre a castration.
Mamati a nalaka nga agsakit dagiti taraken no nabara ti paniempo rason a naiget ti kalikagumna a mabakunaan dagiti nasao nga ayup.
Malaksid iti daytoy, kunana a mabalin pay nga iparehistro dagiti pet owners dagiti tarakenda ngem adda ti bayadna a 50 a pisos iti maysa a dingwen.
Mangnamnama ti City Veterinarian a babaen kadagiti ar-aramidenda nga addang ket narigrigat a kapten ti aniaman a klase ti sakit dagiti ayup.
