LAOAG CITY – Pinabainan ti Philippine men’s national football team ti Maldives 4-1 iti third round ti AFC Asian Cup 2027 Qualifiers.
Immuna a nakairekord ti goal ni Jefferson Tabinas a naiserrekna iti uneg ti 15 a minuto iti ay-ayam a naisayangkat iti New Clark City Athletics Stadium idiay Capas, Tarlac.
Kalpasan ti sumagmamano a minuto ket naiserrek ni Bjorn Kristensen tapno magun-od ti Pilipinas ti 2-0 lamang iti panagngudo ti first half.
Iti panagserrek ti second half ket naiserrek ni Ali Fasir ti Maldives ti goal iti uneg ti 62 a minuto tapno magun-od ti 2-1.
Naammoan a kadagiti simmaruno a minuto ket naiserrek ni Randy Schneider iti uneg ti 77 a minuto tapno magun-od ti 3-1 ken iti maika-92 a minuto ket naiserrek ni Sandro Reyes ti maudi a goal iti iskor a 4-1 ti ay-ayam.
Iggemen ti Pilipinas ti iskor a 1-0 a lamang iti Group A no sadinno a ti sumaruno a makabinnalubalda ket ti Tajikistan, Timor-Leste iti double-round robin.
