LAOAG CITY – Pinalubosan ni Presiding Officer Francis “Chiz” Escudero ti kiddaw ni Davao City Mayor Sebastian “Baste” Duterte nga iyakar ti panagsangona iti Senate impeachment court inton Setiembre 29 ken 30, imbes nga ita nga aldaw, Setiembre 28.
Basar iti surat nga inpatulod ita nga aldaw, inlawlawag ni Mayor Duterte a kasapulanna ti kanayonan nga oras tapno makakolektar, makaurnos ken makakopya dagiti kasapulan a dokumento nga adda iti subpoena-na.
Inbatad ni Escudero a dagiti nasukatan a petsa ket nakalaon iti immuna a subpoena nga inparuk-at ti korte, isu saan a kasapulanen ti mangiruar ti baro.
Naisayangkat ti panagbalbaliw ti schedule kagiddan ti pannakatratar ti impeachment court ti Article II ti Articles of Impeachment kontra ken ni Vice President Sara Duterte mainaig iti maipagarup a saan a mailawlawag a baknang wenno unexplained wealth, saan nga umno a Statement of Assets, Liabilities and Net Worth (SALN) ken ti agtultuloy nga interes iti negosio.
Kabayatanna, namnamaen ti House prosecution panel a mangipaay ti testimonia ni Mayor Baste Duterte mainaig iti GenCorp Industries Inc., maysa a kompania nga adda pakainaiganna iti kabsatna a ti Bise Presidente.
