LAOAG CITY – Saan a lappedan ni Presidente Ferdinand Marcos Jr. dagiti kameng ti gabinetena a mapaayaban iti maikadua a panagdengngeg ti Senado mainaig iti pannakaarestar ni dati a Presidente Rodrigo Duterte.
Inbatad ni Palace Press Officer Atty. Claire Castro, masapul a masungbatan dagiti saludsod a maibatbato kadakuada tapno mapaneknekan nga awan ti biddot iti inaramid a panangarestar iti dati a Presidente.
Nupay kasta, kiddaw laeng ti Palasyo iti Senado ket saan koma a malabsing ti “executive privilege” iti maisayangkat a panagdengngeg.
Naammoan nga inton Huebes, inkeddeng ti Senate Committee on Foreign Relations ti maikadua a panagdengngeg iti nagbalin a proseso ti pannakaarestar ti dati a Presidente nga idadauloan ni Senador Imee Marcos.
Immunan nga inpetteng ti Palasyo nga adda ti “executive privilege” ti Presidente ken Executive officials iti babaen ti Konstitusion tapno maprotektaran ti aniaman a sensitibo nga impormasion kas ti operational details iti pannakibibiang ti dadduma a sangay ti gobierno.
