LAOAG CITY – Nagkiddaw ti sumagmamano a nalatak a tennis player iti intero a lubong a manayunan ti premio iti uppat a Grand Slam tournaments.
Indauloan da Novak Djokovic, Jannik Sinner, Aryna Sabalenka ken Coco Gauff ken 20 a dadduma pay a nagsurat kadagiti organizers ti Grand Slam.
Iti surat idi Marso 21 ket nagkiddaw dagiti nasao a tennis star ti personal a panagtataripnong.
Naammoan a dagiti nasuratan ket isuda Craig Tiley ti Australian Open, Stephane Morel ti French Open, Sally Bolton ti Wimbledon ken Lew Sherr ti U.S. Open.
Kabayatanna, ti sumagmamano a kiddawda ket ti pannakaipangato ti prize money nga umanay iti porsiento dagiti birok iti torneo, nasken a dagiti umaayam ket adda ti pateg iti desision a makaapektar iti salun-at ken kasasaad dagiti umaayam ken nasken a dagiti Grand Slam tournaments ket maaddaan ti financial contributions kadagiti welfare program dagiti umaayam a pinundoan ti dua a pro tours.
