LAOAG CITY – Inbutaktak ni House Deputy Majority Leader ken La Union Rep. Paolo Ortega V dagiti baro a nagnagan nga immawat ti confidential funds ti Office of the Vice President (OVP) ken Department of Education.
Naammoan nga adda iti listaan a nakasurat ket dagiti apilyedo a “Magellan,” “Fionas” ken “Ewan.”
Malaksid iti daytoy, adda pay dagiti nagan nga Honeylet Camille Sy, Feonna Biong, Feonna Villegas ken Joel Linangan ket benepisiario ti P500 milyon a confidential funds ti Office of the Vice President.
Mainaig iti daytoy, dagiti nagan a Fiona Ranitez, Erwin Q. Ewan, Ellen Magellan ken Gary Tanada ket nakaawat iti paset ti P112.5 milyon a confidential fund manipud iti Department of Education.
Dagitoy a nasao a nagnagan ket awan ti opisial a petsa iti pannakaipasngay, kasar wenno petsa ti pannakatay manipud iti Philippine Statistics Authority.
Inbatad ni Ortega a saanen a nasayaat dagiti madukduktalanda a nagnagan gapu ta mangipasimudaag no kasano kaseryoso ti gobierno kadagiti disbursement ti kuarta dagiti tattao.
Maipalagip nga idi Disiembre iti napalabas a tawen idi nangisubmitir ti House Committee on good government and public accountability a 1,992 nga indibidual a karaman iti saan nga usto a panagusar ti confidential ti Office of the Vice President.
Basar iti panagsukisok ti Philippine Statistics Authority nga 670 iti 1,992 a nagan ket adda ti kapadanna a reckord ti Philippine Statistics Authority idinto a 1,322 ditoy ket awan ti birth records, 1,456 met ti awan ti marriage records ken 1,593 ti awan ti death record-na.
