LAOAG CITY – Mangipatungpal ti naig-iget a monitoring ti Provincial Disaster Risk Reduction and Management Council kadagiti lugar a masansan a pakapasamakan ti uram ditoy probinsya.
Segun ken ni Mr. Marcell Tabije, ti Local Disaster Risk Reduction Management Officer, pagtitinnulungan dagiti otoridad ditoy probinsia ken ti gobierno probinsial iti panagbantay kadagiti lugar.
Kunana a daytoy ket babaen iti panagkikinnamayyet ti Bureau of Fire Protection, Philippine National Police, Armed Forces of the Philippines, pakairamanan ti gobierno probinsyal ken dagiti Barangay officers.
Inbatad na a babaen ti panagtitinnulong dagiti maseknan nga agbantay ket dakkel a tulong tapno malapdan iti pannakapasamak ti uram.
Innyon ni Tabije a napagnunumoan da ti pannakaipatungpal ti whole government approach a pakikoordinaran dagiti amin a lokal a gobierno.
Maipalagip a nagsasaruno dagiti nairekord nga uram ditoy probinsia partikular ti forest fire, grass fire ken residential fire.
