LAOAG CITY – Maus-usaren dagiti “water level sensor” a naestablisar iti Karayan Padsan manipud iti ili a Nueva Era agingga ditoy siudad ti Laoag.
Segun ken ni Mr. Marcell Tabije, Local Disaster Risk Reduction and Management Officer ti Provincial Government of Ilocos Norte, maal-ala da ti data babaen iti PAG-ASA.
Inlawlawag na a manamnama a maisayangkat ti “final assessment” ti proyekto iti agtapos ita a bulan ti Septiembre tapno makita a nasayaat no ania pay ti mabalin a maaramid para iti napinpintas a pannakai-transmitna.
Impalgakna nga iti agdama ket maidiretso pay laeng iti PAG-ASA idiay Manila ti data.
Mainaig iti daytoy, kunana nga adda ti kiddaw da a no adda pannakabalin na ket mai-share iti PAG-ASA Laoag para iti al-alisto a pannakai-transmit ti maala a data a kas iti kalikagum ni Gob. Cecilia Araneta Marcos nangnangruna no agdakkel ti danum iti karayan ket alisto a ngumato.
Inbatad na a babaen iti daytoy ket al-alisto a mapakdaaran dagiti kakailian nangnangruna kadagiti agnanaed iti igid ti Karayan.
Inpakaammona a naipadas metten itay kallabes ti nainstolar a “warning post” iti Gilbert Bridge a no madanon diay kangato iti danum a dandani aglepyas ti Karayan ket ag-“siren” ken agpakdaar babaen iti pannakausar dagiti trumpeta a mangipaay ti alarma kadagiti kakailian.
Innayonna a kabaelan a danonen ti pakdaar ti nasao a “waning post” iti tallo agingga iti lima a kilometro.
