LAOAG CITY – Kalikagom ti Philippine Statistics Authority (PSA)-Ilocos Norte ti pannakairehistro dagiti agtawen 0-5 nga ubbing iti Philipine National ID.
Segun ken ni Mr. Johnsen Jett Asuncion, Registration Officer 2 iti PSA-Ilocos Norte, nga ado pay ti sumagmamano a residente ditoy probinsiya a saan pay nakaparehistro.
Gapu iti daytoy, rinugianan dan ti agparehistro kadagiti ubbing babaen ti Rehistro Bulilit no sadinno nga agturong da kadagiti nagduduma a pagadalan, ili, ken siudad ita a bolan ti Nobiembre agingga Disiembre.
Mainaig iti daytoy, kunana a saan laeng a dagiti ubbing ti kalikagomda a makarehistro no diket pati dagiti senior citizens nga awan pay National ID-na.
Innayonna nga iti met biang dagiti saan pay a nakaawat ti national ID ket addan ti inlungalong da nga agbalin ton a decentralized ti printing kadagiti IDs ken maaddaan ton ti printing services ditoy Region 1.
Nupay kasta, saan pay a pinal no kaano a maiparuk-at daytoy ken no sadinno a probinsya ti pakaipanan ti printing services.








