LAOAG CITY – Nangiwayat ti Land Transportation Office, Phililippine Drug Enforcement Agency ken Philippine National Police ti random drug test kadagiti driver ken kundoktor ti bus ken jeep ita a mierkoles santo.
Segun ken ni Engr. Eric Suriben, Assistant Regional Director – Land Transportation Office – Region 1, babaen iti daytoy a gannuat ket maipasigurado a natalged ti biahe dagiti pasahero.
Inbatadna a maisaysayangkat ti random drug test tunggal adda dagiti dadakkel nga events kas ita a lawas ket maob-obserbaran ti semana santa.
Inlawlawagna a no adda ti agpositibo kadagiti dimmalan iti random drug test ket makumpiskar ti driver’s license dagitoy ken kasapulan a dumalan iti rehabilitation center ti Department of Health.
Kunana a saan a maapektaran ti biahe dagiti maseknan a driver ti pampasahero a bus ken jeep gapu ta immunan a nakikoordinarda kadagiti management dagitoy sakbay pay iti pannakaipatungpal ti random drug test kadakuada.
Innayonna nga agarup 100 agingga 150 a driver ken kundoktor ti target-da a dumalan iti random drug test.
Mainaig iti daytoy, inpakaammo ni Agent Marie De Guzman, pannakangiwat ti Philippine Drug Enforcement Agency – Region 1 kagiddan ti random drug test ket nangisayangkatda met ti K9 Sweeping tapno maipasigurado nga awan ti illegal substance kadagiti kagamitan dagiti pasahero.
Kabayatanna, naammoan a kabayatan ti panangiwayat dagiti otoridad ti K9 Sweeping ket awan ti naangot dagiti K9 nga aniaman nga illegal substance.
