LAOAG CITY – Kinondenar ni Deputy Speaker David “Jay-Jay” Suarez ti “weaponization” ti saan nga usto nga impormasyon nga ar-aramiden ken iwarwaras dagiti peke a pro-Duterte demokrasya ti Pilipinas iti mapaspasangasangan a 2025 midterm elections.
Mamati ni Suarez a daytoy ket digital warfar ken ti battlefield ket saan laeng a ti internet no di ket ti panunot ken puso ti minilyon a Pilipino.
Reaksiyon daytoy ni Suarez iti report nga adda ti nangibutaktak ti panagusar dagiti peke nga account iti social media tapno dayawen ni dati a Presidente Rodrigo Roa Duterte ken impluwensyaan ti isyu maipanggep iti eleksyon.
Basar iti research ti Israeli tech firm a Cyabra, mapatta-patta a maysa iti kada tallo nga account nga agpo-post maipanggep iti pannakaarestar ni Duterte babaen iti International Criminal Court (ICC) ket peke.
Naduktalan pay iti report nga agarop 45% dagiti diskurso maipanggep iti 2025 elections ket iwarwaras dagiti peke nga account kas ti bots, fake profiles, ken dagiti mabaybayadan nga influencers no sadinno a minilyon a netizens ti pakadandanunan na.
Inpetteng ni Suarez a lumalaing ken lumawlawa ti network ti disinformation isut gapuna nga in-inot a maiwalwalin ti boses dagiti pudno a tattao iti internet, idinto nga in-inot a maperperdi ti talek ti publiko kadagiti institusyon a rebbeng nga agserbi kadakuada.
