LAOAG CITY – Maysa a namaris ken naidumduma a pintas ti naimatangan idiay Chelsea, Michigan, U.S.A. kalpasan a nangisayangkat ti bayanihan ti sumurok 300 a residente tapno agtitinnulong nga iyakar ti nagian ti maysa a bookstore no sadinno a saggaysa nga inyakar ti rinibu a libro iti babaen ti human chain.
Ti Serendipity Books, maysa nga independent bookstore a kukua ni Michelle Tuplin ket immakar iti sabali a lokasion nga adda iti sumurok-kumurang a 350 a kadapan ti kaadayona manipud iti dati a lokasionna.
Imbes nga agusar ti moving service, nagpanawagan ni Tuplin kadagiti volunteers ken saanda a napaay.
Nakipaset iti aktibidad ti agarup 300 a tattao ken maysa nga aso. Sinaggaysa nga inpasa ti 9,100 a libro manipud iti ima ti maysa a volunteer nga agturong iti maysa agingga a makadanon daytoy iti baro a puesto ti bookstore.
Saan a dimmanon ti dua nga oras ti pakabuklan a proseso ti pannakaiyakar kadagiti libro, maysa a pammaneknek a ti panagkaykaysa ket addaan ti bileg nga aramiden a nalag-an ti nadagsen nga aramid.
Inbatad ni Tuplin, makita iti naiget a pannakikammayet manipud kadagiti nagduduma nga henerasion.
Maysa kadagiti volunteer ket agtawen ti 91 a lola a suki iti bookstore, adda pay dagiti nagannak kadakuada ti agtawen ti innem nga anakda.
Iti panawen no sadinno a ti teknolohia ken online shopping ti masansan a pilpilien, maysa daytoy a pammalagip a dagiti lokal a tiendaan ket saan a basta a negosio laeng no di ket maysa daytoy a komunidad.
