LAOAG CITY – Inpasigurado ni Mr. Abraham Tolentino, Presidente ti Philippine Olympic Committee ti kinatalged dagiti nakipaset iti Tour of Luzon.
Segun kenkuana, adda ti safe committee-da a mangkita kadagiti atleta nangruna ket adda ti epektona ti kinabara ti panawen.
Inlawlawagna a no alisto ti panagbisikletada ket naangin ngem maapektaran ti endurance-da.
Gapu iti daytoy, nakikoordinarda kadagiti local hospitals ken dagiti ospital nga sponsor-da iti daytoy nga aktibidad.
Kabayatanna, mangnamnama ni Tolentino nga agballigi ti nasao a cycling event gapu ta kalpasan ti tallo a tawen ket ita man laengen a nagsubli ken planoda a pagbalinen a tinawen daytoy nga isayangkat.
Naammoan nga adda ti 119 a nakipartisipar manipud iti 17 a grupo, uppat ti international pakairamanan ti Malaysia, Taiwan, South Korea ken Hong Kong idinto a ti 13 a grupo ket manipud ditoy Pilipinas.
Maipalagip a ti Tour of Luzon ket maibilang a ‘Most Iconic professional cycling race’ a nagsubli ita tawen kalpasan ti mano a tawen a naisardeng daytoy ken balbaliw a nairubuat idi kalman iti ili ti Paoay kangrunaanna iti sango ti Paoay Church.
