LAOAG CITY – Natay ti driver ti private tricycle kalpasan ti panagdinnungparda ti maysa nga Isuzu Forward Truck iti paset ti Manila North Road ti Barangay 18 iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig ti biktima a driver ti private tricycle a ni Daryl Corpuz, agtawen ti 38 ken residente ti Barangay 17 ditoy siudad ti Laoag idinto a nabigbig met ti driver ti Isuzu Forward Truck a ni Herbert Balisalisa, agtawen ti 36 ken residente ti Malimpin, Dasol, Pangasinan ken adda ti dua a kaduana a nakalugan.
Inbatadna a basar iti inwayatda nga imbestigasion, kabayatan a dumaldalyasat ti private tricycle nga agturong nga agpa-amianan ket maipagarup nga immagaw iti sabali a linya ti kalsada a nangitunda ti panagdinnungparda iti Isuzu Forward Truck.
Gapu iti daytoy, nagsagaba ti nakana a sugat ti driver ti private tricycle kangrunaanna iti ulona ken sumagmamano a paset ti bagina a naitaray iti Mariano Marcos Memorial Hospital and Medical Center iti siudad ti Batac babaen ti panagresponde dagiti kameng ti Municipal Health Office ken Bureau of Fire Protection ngem naideklarar a dead on arrival idinto a saan met a naan-ano dagiti nakalugan iti Isuzu Forward Truck.
Kabayatanna, inpakaammo ni P/Capt. Damo nga iyur-urayda ti agbalin a desision ti pamilia ti biktima maipanggep iti napasamak a desgrasia.
