LAOAG CITY – Kinettel ti maysa nga ama ti bukudna a biag kalpasan nga adda ti maipagarup a saanda a nagkinnaawatan ti asawana nga Overseas Filipino Worker.
Segun ken ni P/Capt. Randy Damo, Hepe ti Solsona Municipal Police Station, ti biktima ket agtawen ti 38, naasawaan ken residente iti nasao nga ili.
Inbatadna a basar iti imbestigasionda ket napan ti katugangan a babai ti biktima iti pagtaenganda tapno kitaen no nakaturogen dagiti appokona ngem nakigtot daytoy idi nakitana a nakabitinen a nakagalot babaen ti tali ti tengnged ti biktima iti mismo kuartona.
Inlawlawagna a ginundawayan ti biktima nga aramiden ti panangkettel ti biagna idi maobserbaranna a nakaturogen dagiti annakna kadayta a gundaway.
Kunana a saanda pay a masinunuo no ania ti rason ti saan a panagkinnaawatan ti biktima ken ti asawana a nangitunda ti panangkettelna ti biagna.
Innayonna a daytoy ti umuna a daras a ginandat ti biktima a kettelen ti biagna.
