LAOAG CITY – Natay ti maysa a lalaki kalpasan a nadisgrasya ti inturong na a tricycle iti paset ti Barangay Road ti Sitio Rango bisinad iti Brgy 27, Duripes iti ili ti Bacarra.
Nabigbig ti biktima a ni Rodrigo Maneja y Pascua, agtawen ti 63, naasawaan, mannalon ken residente iti Brgy. 27, Duripes iti nasao nga ili.
Basar iti imbestigasyon dagiti kameng ti Philippine National Police, agpapa-abagatan ti biktima ken idi makadanun iti agkurba a paset ti kalsada ket napukawan ti kontrol iti steering bar ken aksidente a natnag iti kataltalunan.
Gapu iti daytoy, nagsagaba ti sugat iti nagduduma a paset ti bagi ti biktima ken naitaray a dagus iti Bacarra Medical Center ngem naideklarar a dead on arrival gapu iti traumatic brain injury secondary to vehicular accident.
