Pormalen a nagsapata kas baro nga ‘Associate Justice’ ti Supreme Court ni dati a Commission on Audit (COA) Chairperson Gamaliel A. Cordoba.

Naisayangkat ti nadakamat a seremonia ti panagsapata idi kalman, Nobiembre 19, iti En Banc Session Hall ng Korte Suprema idiay Manila.

Indauloan daytoy ni Supreme Court Chief Justice Rodil Zalameda ti panagsapata ni Justice Cordoba nga inatendaran ti pamilia ken kakadua.

Nagatendar pay da Senior Associate Justice Marvic M.V.F. Leonen, Associate Justices Ricardo Rosario, Jhosep Lopez, Antonio Kho, Jr., ken Raul Villanueva, pakairamanan pay da retired Chief Justice Alexander Gesmundo, dagiti opisial ken dadduma pay.

Sinukatan ni Justice Cordoba ni Supreme Court Associate Justice Amy Lazaro-Javier a naikeddeng nga agretiro iti korte ita a bulan.

Segun iti Korte Suprema, addaan ti kapadasan ni Associate Justice Gamaliel A. Cordoba iti umabot ti tatlo a dekada iti panagsanay ti linteg, public administration ken serbisio iti gobierno.

Sakbay a madutokan iti korte, nagserbi ni Justice Cordoba kas mangidaulo ti Commission on Audit manipud 2022 aingga 2026, ken ti sumagmamano a napapateg a posision iti Office of the President kas Undersecretary, Assistant Executive Secretary ken Technical Assistant.

Nagbalin pay daytoy a direktor ti Philippine Amusement and Gaming Corporation idi 2008 agingga 2009.

Kabayatanna, ni Associate Justice Cordoba ti maikatlo nga ‘appointee’ iti Korte Suprema ni Presidente Ferdinand ‘Bongbong’ Marcos, Jr. a panagakem na.