LAOAG CITY – Posible a manayonan pay dagiti kaso a sangsangoen ni dati a Presidente Rodrigo Duterte iti International Criminal Court (ICC) basar ken ni International Criminal Court – accredited Filipino lawyer Gilbert Andres a mangibagbagi kadagiti sumagmamano a biktima.
Kunana a ti posible a mairaman iti imbestigasion ken ni Duterte ket dagiti kaso ti rape ken torture.
Idi Pebrero ket nangipila ti Office of the Prosecutor ti International Criminal Court ti aplikasion para iti arrest warrant kontra ken ni Duterte a naglaon ti 45 a kaso ti panagpatay, uppat a kaso ti torture ken tallo a kaso ti rape a basar iti imbestigador ket addaan ti reasonable grounds kas isuna ket indirect wenno co-perpetrator.
Naammoan a naibasar daytoy iti 2019 report a naawat ti International Criminal Court Office of the Prosecutor a nangidetalye iti maipagarup a panangrames ti law enforcement officers kadagiti babbai nga addaan ti personal a pakainaiganna kadagiti indibidual a mapapati nga adda ti koneksionna iti droga a maipagarup a sumagmamano kadakuada ket pinapatay.
Malaksid iti daytoy, inrakurak ti United States State Department a 16 a Filipino police officers a ti karaman iti walo a kaso ti rape sipod idi 2017 a kangitingitan ti war on drugs.
Nakairekord met ti Center for Women’s Resources (CWR) ti 13 a kaso ti panangabuso nga iwaywayat dagiti police officer iti nagbaetan ti Enero 2017 ken Hulio 2018.
Naikeddeng ti sumaruno a panagdengngeg ti International Criminal Court inton bulan ti Septiembre.
