LAOAG CITY – Kinasoanen ti Department of Justice ni dati a Presidential Spokesperson Harry Roque mainaig iti pannakairaman daytoy iti pannakatiliw ti scam hub idiay Porac, Pampanga.
Ni Roque ket kinasoan ti qualified human trafficking iti Angeles City Regional Trial Court (RTC) idiay Pampanga.
Nakasoan pay ni Cassandra Ong ken 48 a dadduma pay nga agtagikua, opisial ken empleado ti kompania Whirlwind ken Lucky South 99 Philippine Offshore Gaming Operator nga inakusaran a mangpatpataray iti scam farm a karaman iti trafficking.
Iti resolusion ti piskalya, naiwayat ti krimen iti dakkel a syndikato isu a karaman daytoy ti Section 6 ti linteg a maysa a non-bailable offense.
Inpetteng ti Department of Justice a maipagarup a nabenepisiaran ni Roque iti panangilungalong daytoy a ma-renew ti Internet Gaming License ti Lucky South 99.
Inadmitir idi ni Roque a nagbalin nga abugado daytoy ti Whirlwind iti maysa nga ejectment case.
Malaksid iti daytoy, inadmitir pay ni Roque a tinulonganna ni Ong iti pannakitaripnong iti Philippine Amusement and Gaming Corporation (Pagcor) para iti renewal ti Philippine Offshore Gaming Operator license ti Lucky South ngem kunana a saan nga amin dagitoy ket mangipasimudaag a maysa a klase ti trafficking.
Kabayatanna, ni Roque ket agdama nga adda idiay The Hague, Netherlands para iti asylum application-na no sadinno nga ipetpetteng ni Roque a makapaspasar isuna ti political persecution iti administrasion Marcos.
