LAOAG CITY – Rumrumuar iti imbestigasyon ti Philippine National Police a nakainom ti nasanger ti biktima iti napasamak a disgrasya iti by-pass road iti paset ti Barangay Vira ditoy siudad ti Laoag.
Daytoy ti inbatad ni Police Captain Rogeline Ibe iti Philippine National Police ditoy ciudad ti Laoag.
Nabigbig ti biktima a ni Ajonrie Romy Philip Wasay, agtawen ti 24, ken residente iti Brgy. 7 Badio iti ili ti Pinili.
Naamoan nga iti dayta a gundaway ket agturong koma ti biktima iti balay ti nobya na iti nadakamat a barangay.
Segun pay ken ni Ibe, pinakleban ti biktima ti motorsiklo na ken napaspas ti tarayna isut gapuna a simmemplang.
Gapu iti kapigsa ti impact ti pannakaidungpar ti biktima iti poste ket naisina ti maysa a saka ken ima ti biktima.
Kabayatanna, basar iti nakalap nga impormasion ti Bombo Radyo Laoag News Team a ti biktima ket kapaspasana laeng iti Criminology Licensure Examination.
