LAOAG CITY – Masapol nga adalen a naimbag ti kalikagom ti Department of Transportation (DOTr) a mangiyuswat ti regular drug testing para kadagiti drivers ti pampubliko a transportasyon.
Daytoy ket kalpasan ti nagsasaruno nga aksidente dagiti lugan a nakatayan ti sumagmamano nga indibidual.
Inbatad ni Presidential Communications Office Undersecretary ken Palace Press Officer Claire Castro iti press briefing iti Malakanyang a masapol met nga ikonsiderar ti kinatalged dagiti drivers ken commuters.
Immuna iti daytoy, inbatad ni PISTON President Ka Mody Floranda a masapol a saan koma nga agbalin a mandatory ti drug testing gapu ta kasingin daytoy ti isyu seknan ti pinansyal.
Kabayatanna, inrakurak ti Department of Transportation a dagiti operator ti mangibaklay ti magastos para iti drug testing.
Kuna pay ni Transportation Secretary Vince Dizon a makitinnulong ti Department of Transportation (DOTr), Land Transportation Office (LTO), Land Transportation Franchising and Regulatory Board (LTFRB) ken Philippine Drug Enforcement Agency (PDEA) iti pannakaipatungpal ti nasao a pammilin.
Innayon na a ti mandatory drug testing ket agbalin a regular basis ken maiyuswat iti kada 90 nga aldaw.
