LAOAG CITY – Adalen nga umuna ni Presidente Ferdinand Marcos Jr. ti nailungalong a pannakaitantan ti 2026 Barangay at Sangguniang Kabataan Elections (BSKE) sakbay nga agdesisyon no pirmaan na daytoy wenno saan.
Inbatad ni Palace Press Officer Claire Castro a saanna pay a makumpirmaran no naipatuluden iti Office of the President dagiti bersyon ti gakat.
Maipalagip nga inaprubaran ti senado idi Lunes ti gakat a maiyakar iti Nobyembre 2028 ti 2026 Barangay at Sangguniang Kabataan Elections nga orihinal a naikeddeng intono Nobyembre ita a tawen.
Immunan nga inaprubaran ti kamara de representantes ti counterpart measure idi Setyembre 8.
Iti babaen ti gakat, maiyatiddog manipod iti uppat ken mapagbalin a lima a tawen ti termino dagiti barangay ken Sangguniang Kabataan officials.
Kontraen met daytoy ti sumagmamano nga election watchdog groups ti baro a pannakaitantan ti eleksyon.
