LAOAG CITY – Nagpalagip ti Philippine National Police-Highway Patrol Group (HPG) kadagiti motorista a siguradwen ti kinatalged iti kalsada ita nga Undas kagiddan ti manamnama a panagado dagiti biyahero.
Segun ken ni Highway Patrol Group chief Police Brig. Gen. Joyce Patrick Sangalang, umabot iti 761 nga HPG personnel ti iwaras da iti intero a pagilian tapno tumulong iti traffic management, highway security ken assistance kadagiti motorista.
Suportaran da ti 586 a force multipliers, idinto a maiwaras met iti field ti administrative personnel gapu ta naka-full alert ti Highway Patrol Group.
Pinalagipan ni Sangalang dagiti motorista nga iparking da dagiti luganda iti nalawlawag ken nataltalged a lugar, siguradwen a naka-lock dagiti tawa ken ridaw ti behikulo ken saan nga ibati ti tulbek iti uneg ti kotse wenno motorsiklo.
Inrekomendar met ti Highway Patrol Group ti panagusar ti anti-theft devices kas ti steering-wheel locks, motorcycle handlebar locks, alarms ken GPS trackers.
Sakbay nga agbiyahe ket inspeksyunen ti battery, silaw, preno, ligay, makina ken fuel supply ti lugan tapno maliklikan ti aberya ken aksidente.
Pinalagipan pay ni Sangalang dagiti driver a saan nga agmaneho a makaturturong, nabartek wenno adda iti impluwensya ti nasanger ken droga.
Basar iti Highway Patrol Group, umaboten iti 118,600 a road crash incidents ti nairekord manipod Enero agingga iti Oktubre 15 ita a tawen, no sadinno a kaadoan ditoy ti overspeeding nga addaan ti 37,000 nga insidente, sumaruno ti overtaking, self-accidents, drunk driving, panagusar ti cellphone kabayatan ti panagmaneho ken mechanical factors.
Kaadoan a lugan a nairaman iti road crashes ket dagiti motorsiklo nga umabot iti 57,700 nga insidente.
Nakairekord metten ti Highway Patrol Group ti 3,816 nga indibidual a pimmusay gapu iti road crashes iti kapada a tawen.
