LAOAG CITY – Mangipaay ti “libreng sakay” ti Ilocos Norte Police Provincial Office para kadagiti delegado iti Palarong Pambansa tapnu masigurado ti kinatalged dagiti atleta nga agsangpet ditoy probinsya.
Daytoy ti inpakaammo ni Police Col Frederick Obar ti Provincial Director iti Ilocos Norte Police Provincial Office.
Segun kenkuana, manipud iti Laoag International Airport a pagsungadan dagiti delegado ket maitulod da kadagiti pagtalinaedan da a billeting areas a naiwaras ditoy probinsiya.
Kuna na nga agtultuloy daytoy a ganwat ti nailian a pulisya agingga a malpas ti Palarong Pambansa intono Hunyo ita a tawen.
Kabayatanna, ginutigot ni Obar dagiti umili a makitinnulong a mangsalwad iti aglawlaw tapnu agballigi ti panaghost ti Ilocos Norte iti Palarong Pambansa.
