LAOAG CITY – Naburak ni Sam Garcia manipud iti Region 4-A wenno CALABARZON ti dati a rekord iti shot put – elementary category ni Canny Amor Bartolome manipud iti Southern Mindanao nga addaan ti 10:93 meters idi 1996 no sadinno nagun-od ni Garcia ti baro a rekord a 12:48 meters.
Segun ken ni Garcia, saanna a ninamnama ti nagbalin a resulta ti ay-ayamda ngem intedna ti amin a kabaelanna tapno magun-od ti balitok a medalya.
Inbatadna a dagiti naiget a mangsupsuporta kenkuana nangruna ti pamiliana ti nagbalin nga inspirasionna tapno magun-od ti balligi.
Mainaig iti daytoy, nagbiahe ditoy Ilocos Norte ni Mr. Eduardo Garcia, lolo ni Sam manipud pay idiay Batangas tapno imatangan ti panagay-ayam ti apokona.
Kunana nga ammona a nalaing ken mangabak ti apokona gapu ta dimmalan daytoy ti naiget a panagsanay.
Kabayatanna, inpakaammo ni Ms. Lucy Fortugaliza, Coach ni Sam a nakitada ti potensyal ken determinasyon ni Sam sipod nangrugi ti panagsanayda.
