LAOAG CITY – Naipadeportar ni dati a Negros Oriental representative Arnolfo “Arnie” Teves Jr., manipod Timor-Leste naisubli ditoy Pilipinas.
Mismo a ti grupo ni National Bureau of Investigation Director Jimmy Santiago ti napan nangsukon idiay Timor-Leste ken ni Teves.
Iti iruruwar ni Teves iti nakaibaludan na idiay Timor-Leste ket nakaposas ken binayabay dagiti otoridad iti papanna panaglugan iti Philippine Air Force Plane.
Ni Teves ti maitudtudo a mastermind iti pannakapapatay ken ni dati a Negros Oriental Governor Roel Degamo ken siyam a sabsabali pay.
Mainaig iti daytoy, kuna ni Justice Secretary Jesus Crispin Remulla a masapol a sangwen ni Teves dagiti alegasyon kenkuana.
Innayon na a dua a tawen nga inuray da daytoy a mapasamak ken pagyamanan da iti Diyos gapu ta isu ti inur-uray da a reckoning ken masapol a sungbatan na dagiti reklamo kontra iti dati a kongresista.
Maipalagip a ni Teves ket sumangsango ti multiple murder charges gapu iti pannakapapatay ken ni Degamo ken siyam a sabsabali pay idi Marso 4, 2023 iti Degamo residence iti Pamplona, Negros Oriental.
Malaksid iti daytoy, napilaan pay ti reklamo ni Teves gapu iti maipagarop a pannakapapatay ti tallo nga indibidual idiay Negros Oriental idi 2019.
Ni Teves ken 12 a sabsabali pay ket nadesignaran kas terorista babaen ti Anti-Terrorism Council, gapu iti maipagarop a sumagmamano a nakairamanan da a pammapatay ken harassment idiay Negros Oriental.
