LAOAG CITY – Natay ti innem a Palestino ken naruay dagiti nasugatan kalpasan a pinaltu-paltogan ti Israeli forces iti asideg ti maysa nga aid distribution center iti abagatan ti Gaza, basar iti Hamas-run Civil Defense agency.
Napasamak ti insidente kabayatan ti panagtitipon dagiti tattao tapno mangala ti suplay ti taraon.
Segun iti maysa kadagiti pannakangiwat ti Civil Defense, pinaltogan isuda dagiti Israeli kalpasan a ginandat dagiti tattao nga agtinnulong tapno makaasideg iti lugar.
Basar iti Israeli military, maipagarup a nag-warning shots-da kontra kadagiti suspek nga immasideg kadakuada kabayatan a pangpangtaanda dagitoy.
Nagdesision met ti Gaza Humanitarian Foundation (GHF), a tumultulong iti operasion nga isardeng pay laeng dagiti suplay ti taraon tapno mapasayaat ti kinatalged ken maliklikan ti panagdudupudop dagiti tattao.
Nadakamat a nakita ti naruay a Palestino ti gundaway kadagiti roundabout nga asideg iti military zone ti Israel a kasapulanda a pagnaan tapno makaasideg iti aid site.
Immunan a nagballaag ti Israel Defense Forces kadagiti tattao ti Gaza a ti lugar ket maysa nga aktibo a combat zone nangruna iti rabii.
Iti agdama, agarup 54,677 a Palestine civilian ti pimmusayen sipod idi nangrugi ti rinnupak iti Gaza kas maibasar iti kaudian a datos ti Ministry of Health ti Gaza.
