LAOAG CITY – Innem a tattao ti natay a pakairamanan ti maysa a kameng ti media ken dua nga ubbing, iti nagsina nga airstrike nga inpabanto ti Israel iti Gaza.
Basar iti report, immuna a natamaan ti missile ti maysa nga apartment iti Gaza City a nakatayan ti dua nga agkabsat a dagitoy ket agtawen ti 4 ken 14.
Kabayatanna, adda met ti tallo nga indibidual a natay iti maysa pay nga airstrike a timmama iti Bureij refugee camp iti central Gaza no sadinno a karaman kadagiti pimmusay ket ni Ahmed Wishah, cameraman ti international broadcaster nga Al Jazeera.
Iti rakurak ti Israeli military, inbatad da a ti insayangkat da ket maysa a “precise strike” kontra ken ni Wishah gapu ta ipetpetteng da a konektado daytoy iti military wing ti Hamas ken ibilang da a pangta kadagiti soldado da.
Agtultuloy met a paglikudan ti Hamas ken dadduma pay a Palestinian groups ti sumagmamano nga akusasyon ti Israel kontra kadagiti sibilyan ken media workers.
