LAOAG CITY – Kalikagom ni Konsehal Jayson Perera a maadal no ania ti nasaysayaat a maikabil nga street light ditoy ciudad ti Laoag iti nagbaetan ti solar light ken incandescent light globe.
Daytoy ket kalpasan a naobserbaran na nga ado dagiti street lights a saanen nga agop-operar ditoy ciudad.
Kunana a ti magusgustwan a proyekto ti gobierno ket ti mangimuntar ti solar lights ngem kalpasan ti sumagmamano a bolan ket saanen nga agsilaw wenno saan nan a kabaelan nga ipaayan ti nasayaat a raniag iti lugar a nakaimuntaran na.
Innayon na pay a kabayatan ti Palarong Pambansa ket naobserbaran na nga iti oras ti alas-dyes pay laeng ti rabii ket adon dagiti solar lights a nakaiddep.
Maladingitan ni Perera gapo ta saan a maipaay ti umno a gagem ti gobierno iti pannakaikabil kadagitoy a banag aglalo ket dakkel a kantidad ti naiyalokar kadagitoy a proyekto.
Gapo iti daytoy, kiniddaw na iti konseho a mangsarak kadagiti comparative study dagiti grupo wenno ahensya a mangipakpakita no ania ti epektibo ken nalaklaka iti nagbaetan ti solar light wenno silaw nga agoperar babaen iti enerhiya manipod iti init wenno iti incandescent light globe wenno silaw nga agoperar babaen iti elektrisidad.
Innayon na pay a kalikagum na a maaddaan ti kopya ti kontrata dagiti solar lights nga agdama a nakaimuntar tapno maamwan no aginggat ania oras ti rumbeng a panagoperar da ken siasinno ti akin-responsiblidad no adda ti problema, no ti gobrieno, supplier wenno contractor.
Kabayatanna, kiniddaw ni Vice Mayor Carlos Fariñas a mapaayaban iti session da ti City Engineering Office tapno mangipaay ti assessment kadagiti streets lights ditoy ciudad ti Laoag.
