LAOAG CITY – Inrakurak ni Department of Justice Secretary Jesus Crispin Remulla a maipagarop a saan nga inawat ti The Netherlands ti asylum application ni dati a presidential spokesperson Atty. Harry Roque.
Segun pay iti sekretaryo, ti kaso mainaig iti agbalin a resolusyon ti asylum application ni Roque ket naipasa payen iti pagilian a Germany.
Gapu iti daytoy, inbatad ni Remulla nga agur-uray ti Department of Justice no ania ti agbalin a resulta iti daytoy ken kunana a mabalin a mangipila ti extradition kontra ken ni Atty. Roque.
Nupay kasta, inpalgak ti sekretaryo a mabalin a saanen a kasapulan daytoy gapu iti possible a pannakakanselar ti pasaporte ni Roque.
Innayon na a no maibilangen nga ‘undocumented alien’ ti dati a presidential spokesperson ket mabalin a sumrek ditoyen ti International Criminal Police Organization.
