LAOAG CITY – Nangisyu ti Bureau of Immigration ti ballaag iti publiko mainaig kadagiti maididiaya a makaallilaw a trabaho iti sabali a pagilian.
Iti statement nga inparukat ti ahensya, pinalagipan na dagiti Pilipino kangrunaan na dagiti agbirbiruk ti trabaho a saan a dagus a mamati kadagiti makitkita a job offers.
Inaramid daytoy ti ahensya kalpasan nga adda ti nasaed da a dua a Pilipino a biktima ti ‘trafficking scheme’ iti naala da a trabaho iti abroad.
Segun ken ni Immigration Commissioner Joel Anthony Viado, ti ballaag ket maiyataday iti direktiba ti presidente a patalgeden ti laban kontra kadagiti kaso ti human trafficking.
Naamoan a napasamak ti panangsaed ti ahensya kadagiti dua a babai a biktima iti Ninoy Aquino International Airport (NAIA) nga agturong koma idiay Singapore.
Nagpabigbig dagitoy a nasinged nga agpagayam ngem naduktalan a saan da nga agam-ammo ken saan nga iti mismo a Singapore ti destinasyon da no di ket iti Albania.
Rumrumuar a na-recruit da kas household service workers ken naikari kadakuada a makaawat ti sweldo a 38,000 a pisos iti kada bolan.
Nupay kasta, inadmitir da metlaeng a na-contact laeng ida ti recruiter iti babaen ti social media post ken online messaging application.
Gapu iti daytoy, gutgutiguten ni Immigration Commissioner Joel Anthony Viado dagiti Pilipino nga agbalin a naan-anay a naannad ken kumunsoltar nga umuna iti gobierno sakbay nga umawat ti overseas job offers.
