LAOAG CITY – Kinumpirmaran ti Bureau of Jail Management and Penology iti siudad ti Batac a natiliwen ti nakalibas a balud idi kalman.
Nabigbig ti nasao a balud a ni Mahnoel Ofilas Revilla, agtawen ti 43, naasawaan, drug surrenderee ken residente ti Barangay Medina iti ili ti Dingras.
Sumangsango daytoy kadagiti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002 ken ti Republic Act No. 10591 wenno ti Comprehensive Firearms and Ammunition Regulation Act.
Naammoan a naiwayatan ti Search Operation ti nadakamat a balud iti ili ti Dingras idi bulan ti Abril.
Iti agdama, bayat a maisursurat daytoy a damag ket saan pay a nangiparuk-at ti naan-anay a detalye ti Jail Warden ti Bureau of Jail Management and Penology iti siudad ti Batac maipanggep iti daytoy a banag.
