LAOAG CITY – Insubmitiren ti Philippine General Hospital (PGH) iti Sandiganbayan ti medical examination report ni dati a House Speaker Martin Romualdez, a sumangsango iti nonbailable a kaso a plunder.
Mausar ti nasao a report tapno maamoan no masapol pay nga agtalinaed ni Romualdez iti Philippine General Hospital (PGH) wenno mabalin daytoy a maiyakar iti New Quezon City Jail iti Payatas.
Manamnama a sumango iti Sandiganbagan inton bigat ni PGH Director Dr. Gerardo Legaspi wenno ti mangibagi kenkuana tapno ilanad ti resulta ti independent medical examination ni Romualdez.
Kabayatanna, inbatad ti Bureau of Jail Management and Penology (BJMP) a sisasaganada nga iyakar ni Romualdez iti Quezon City Jail iti oras a bilinen ida ti Sandiganbayan.
Mainaig iti daytoy, no agtalinaed iti Philippine General Hospital (PGH), agtultuloy a bantayan ti BJMP ti dati a House speaker iti uneg ken ruar ti private room-na, pakairamanan iti aglawlaw ti ospital.
Segun iti pannakangiwat ti BJMP a ni Jail Supt. Rex Bustinera, iti agdama awan ti madmadlawda nga aniaman a pangta ken ni Romualdez ken agtaltalinaed a normal ti security situation manipud idi nangrugi daytoy nga adda iti kustodiyada idi Huebes.
Naipan ni Romualdez iti Philippine General Hospital manipud iti Cardinal Santos Medical Center iti San Juan City idi laeng Sabado para iti pannakaidalan iti imbestigsion kalpasan ti naiparuk-at a warrant of arrest kontra kenkuana.
Ni Romualdez ket sumangsango iti P7.4-billion plunder case nga impila ti Office of the Ombudsman kontra kenkuna ken kadagiti tallo pay nga indibidual mainaig iti maipagarup kickback scheme kadagiti flood control project.
Iti mosion tapno agtalinaed daytoy iti ospital, inbatad ni Romualdez a makapaspasar daytoy ti Type 2 diabetes, hypertension, primary hypothyroidism ken kadagiti dadduma pay a sakit.
It baet daytoy, no maiyakar iti New Quezon City Jail, dumalan nga umuna ni Romualdez iti baro nga assessment tapno maamoan no sadino a pagbaludan ti pakaipiitan ni Romualdez.
Kabayatanna, addaan ti sumurok 3,200 a Person Deprived of Liberty ti nakabalud iti Quezon City Jail, kumparar iti maipagarup a kapasidadna a 4,200 agingga 4,300.
