LAOAG CITY – Kinumpirmaran ti Philippine National Police a tulang ti tao dagiti naala a naikabil iti sako a naibelleng idiay Taal Lake idiay Talisay, Batangas.
Inbatad ni Philippine National Police Chief Gen. Nicolas Torre III a daytoy ti rimmuar iti inisyal a panangtingiting dagiti eksperto iti nailian a pulisia.
Inlawlawagna a posible nga adda ti nailauk met a tulang dagiti ayup kadagiti naduktalanda iti lugar.
Kunana nga iti pakabuklan a lima a sako a narekobre manipud iti Taal Lake ket naiget ti panangtingitingda kadagitoy.
Naammoan a naikabil dagitoy iti forensic group tapno mangisayangkat ti cross-matching ti DNA samples kadagiti mapukpukaw a mammallot.
Iti agdama, adda ti 12 a pamilia dagiti mapukpukaw a mammallot ti nangipaay ti DNA samples tapno mai-crossmatch kadagiti naduktalan a tulang.
