LAOAG CITY – Inbilin ni Philippine National Police Chief General Jose Melencio Nartatez Jr., ti naiget nga imbestigasion iti maipagarup a “secret meeting” iti nagbaetan dagiti kabagian dagiti mapukpukaw a mammallot ken dagiti inikkat a pulis a maikonkonektar iti kaso.
Inbatad ni Nartatez a saan laeng a panagswitik iti pammilin ti ar-aramiden nga aniaman a tignay iti ruar ti PNP no diket panagswitik pay iti talek ken kumpiansa dagiti tattao a pagserserbian daytoy.
Nadakamat a maysa ti kaso dagiti mapukpukaw a mammallot kadagiti kontrobersial ken saan pay a naresolbar nga imbestigasion iti pagilian kalpasan a napukaw ti cockfighting enthusiasts manipud 2021 agingga 2022.
Immunan nga inbutaktak ti Napolcom ti maipagarup a pannakairaman ti dua a pulis iti panangiyal-alisto dagiti limed a panagtataripnong iti nagbaetan dagiti kabagian dagiti mapukpukaw a mammallot ken dagiti inikkat a pulis.
Basar iti PNP a kagiddan ti imbestigasion ti National Police Commission (NAPOLCOM) ti iwaywayat nga internal probe iti uneg ti organisasion.
