LAOAG CITY – Naulaw ti agarup 100 nga estudiante ti Ilocos Norte National High School gapu iti magnitude 5.8 a gingined.
Segun ken ni Mr. Jerry Carreon, School Principal IV iti nasao a pagadalan, dagiti nasao nga agad-adal ket naitaray iti School Clinic, ospital, Office of the School Principal ken Student Activity Center.
Nupay kasta, inbatadna nga awan ti nadangran kadakuada ngem nagnerbios laeng gapu iti panagdanag ken panagbuteng dagitoy.
Inlawlawagna nga adda dagiti inpadanon a ladawan dagiti mangisursuro kenkuana nga adda dagiti rikki ti sumagmamano a pasdek iti pagadalan.
Mainaig iti daytoy, naruay a nagannak ti insigida a nagturong iti nasao a pagadalan tapno sukonen dagiti annakda gapu iti napasamak a gingined.
Kabayatanna, nagtinnulong ti City Disaster Risk Reduction and Management Office ken Bureau of Fire Protection tapno kitaen ti kasasaad dagiti estudiante.
