LAOAG CITY – Ilunglungalong ti Department of Agriculture (DA) ken ni Presidente Ferdinand R. Marcos Jr. a temporaryo a maisardeng ti panagangkat ti bagas ken ipangato ti taripa iti imported a bagas tapno maprotehiran dagiti lokal a mannalon.
Iti rakurak ni Presidential Communications Office (PCO) Secretary Dave Gomez, trataren ti Gabinete daytoy nga isyu iti sidelines ti state visit ni Presidente Marcos idiay India manipod Agosto 4 agingga iti Agosto 8.
Awan pay ti naipaay a detalye mainaig iti eksakto a pagngatoan ti taripa wenno kasano ti kabayag ti plano a pannakasuspenso ti rice importation.
Inlungalong met ti Philippine Council for Agriculture and Fisheries (PCAF) ti pannakaipatungpal manen ti 35% a taripa iti imported rice tapno mapagtalinaed a competitive ti presyo ti lokal nga irik dagiti mannalon.
Inlawlawag ti Philippine Council for Agriculture and Fisheries nga iti panagngato ti presyo ti imported rice, ad-adda a maprotehiran dagiti lokal a mannalon.
Maipalagip nga idi Hunyo 2024, pinirmaan ni Marcos ti Executive Order No. 62 a nangipababa ti taripa ti bagas manipod iti 35% napagbalin a 15% agingga iti 2028 tapno makontrol ti presyo ti bagas.
