LAOAG CITY – Natay ti Bise Mayor ti Ibajay, Aklan a nabigbig a ni Vice Mayor Julio Estolloso iti uneg mismo ti opisinana pasado 9:15 itay bigat ita nga aldaw ti Biernes.
Basar iti Ibajay Municipal Police Station, pinaltogan ti gunman a nabigbig a ni Sangguniang Bayan Member Mihrel Senatin ti opisial babaen ti maysa a 9mm a paltog a nakatamaan iti akinkannigid a barukong ti Bise Mayor.
Insigida a naitaray iti ospital ti opisial ngem naideklarar a dead on arrival iti oras ti 10:23 ti bigat.
Kitkitaen a motibo iti krimen ket ti posible a nagbalin a panagbinnara iti biktima ken ti suspek iti session hall kalpasan a nagkiddaw ti suspek ti kopya dagiti ordinansa a naipasa iti babaen ti termino ni Estolloso.
Iti agdama, manarimaan ti imbestigasion ti insidente idinto nga adda iti pagbaludan ti Ibajay Municipal Police Station ti suspek a naarestar kalpasan a ginandatna pay ti aglibas iti crime scene.
Kabayatanna, naammoan a lima a basyo ti bala ti nakita iti nakapasamakan ti krimen.
