LAOAG CITY – Maipaay ti Income Tax Holiday kadagiti agupa iti Ilocos Norte Capitol Complex apaman a maideklarar ti nasao a lugar kas IT Park babaen ti Philippine Economic Zone Authority (PEZA).
Daytoy ti inbatad ni Ms. Rhona Bueno iti Ilocos Norte Trade and Investment Promotions Office iti kapitolyo probinsyal.
Inlawlawagna a ti Income Tax Holiday a maipaay kadagiti negosyante nga agupa iti nadakamat a lugar ket agpaut iti uppat a tawen.
Innayon na a mabalin nga at-atiddog pay kadagiti lugar iti ruwar ti Metro Manila a saan a maikunsiderar nga “highly urbanized city” a kas iti Ilocos Norte.
Malaksid iti daytoy, inpakaammo ni Bueno a dagiti met agpaupa a kas iti gobierno probinsyal ket umado dagiti maipaayan da ti pagtrabahoan ken manayunan ti mapastrek manipud iti pagupa dagiti maseknan pakairamanan ti buwis ti kompania ken dagiti empleado dagitoy.
Kabayatanna, kunana a dakdakkel ti oportunidad a mailako dagiti “commercial spaces” iti capitol complex kadagiti Business Process Outsourcing wenno wenno call center gapu ta masansan a ti birbirukenda ket ti “accreditation” manipud iti Philippine Economic Zone Authority.
Naamoan a maiyur-uray laengen ti sumagmamano a dokumento a maipasa iti Philippine Economic Zone Authority ken kalpasan iti daytoy ket manamnama a maiproklamar ton ti nasao a lugar kas IT PARK ita a bulan.
