LAOAG CITY – Agtultuloy ti panagbirbiruk dagiti rescue workers iti Northern Nigeria kadagiti 25 a mapukpukaw a pasahero ti naarinebneb a bangka iti kabaybayan a paset ti Sokoto state.
Basar iti National Emergency Management Agency (Nema), ti bangka ket nagkarga ti nasurok a 50 a tattao idi naarinebneb iti Goronyo river.
Inbatad ni Councillor Aminu Bare iti Sokoto, a dagiti 25 nakalugan iti bangka ket nabirukan da a sibibiag idinto a dagiti dadduma ket saan da pay a nakita agpapan kadagitoy a gundaway.
Maipalagip a masansan nga adda dagiti maarinebneb a bangka iti Nigeria gapu iti kaado ti pasashero na, saan a pannakamentenar a naimbag dagiti bangka ken ti pannakaapay a mangipatungpal ti safety regulations.
