LAOAG CITY – Agrekreklamo ni Ms. Evangeline Roqua iti Brgy 55-B, Salet Bulangon ditoy suidad ti Laoag gapu ta maipagarup a saan nga ikkan ti kapitan ti barangay da ti Certificate of Low income.
Kunana nga iti panagturong na iti barangay hall ket naibaga kenkuana a kasapulan nga agbayad ti sangribo a pisos a multa gapu iti saanna a panagdaldalus iti barangay da sakbay a maikkan ti Certificate of Low Income.
Inbatad na a nakasagana nga agbayad ngem maipagarup nga awan met iti ordinasa wenno resibo nga ited ti kapitan.
Inbatad na a kasapolan na iti certificate of low income gapu ta agpatulong daytoy iti opisina ni Congressman Sandro Marcos para iti pannakaopera ti mata iti asawa na.
Mainaig iti daytoy, inlawlawag ni Barangay Chairman Fernando Baracao iti Barangay 55, Salet-Bulangon ditoy ciudad ti Laoag a saanna nga ikkan ti certificate of Low Income ni Roqua gapu ta a saan da a kwalipikado.
Inpalgak na a saan a karaman ti pamilya Roqua kadagiti maibilang a nakukurapay iti barangay da gapu ta adda ti bukod da a negosyo, nakagatang da ti brand new a lugan ken adda pay ti inauna nga anakna idiay Canada.
Masdaaw ti kapitan gapu ta kabaelan ti pamilya a gatangen ti aniaman a kayatda ngem saanda a kayat ti aggastos para iti pagpaagas da.
Inpaganetget ti kapitan nga ad-ado pay dagiti kabarangayan da ti pudno nga agkasapulan para iti medical assistance wenno tulong manipod gobierno imbes nga isuda paylaeng nga adda ti kabaelanna iti panagbiag.
Inbutaktak pay ni Kapitan Baracao a namin-adon a daras a naireklamo ni Roqua ngem saan a mapan makisarsarita iti barangay, pakakitaan nga awan ti panangrespetar na kadakuada.
Innayon na a no maipapan iti panagbayad ti sangaribo a pisos iti kada pamilya a saan a mapan tumulong nga agdalos iti barangay ket nabayagen a naiyimplementar daytoy no sadinno nga idi un-unana ket 500 a pisos laeng ngem gapu ta agriri dagiti mapmapan agdaldalos ket inpangato da daytoy.
Inadmitir na nga awan iti ipaay da a resibo no adda dagiti agbayad ngem inpasigurado na nga amin dagiti maukkon da a pondo ket mausar para iti pannakapapintas ken pagsayaatan ti barangay da.
Kabayatanna, inanamongan ni Atty. Gerald Gallardo, provincial director ti Department of Interior and Local Goverment ditoy probinsia ti palawag ni Barangay Chairman Baracao a saan a rumbeng a maipaayan iti certificate of low income ti bumarangay nga adda met ti kabaelanna iti panagbiag.
Innayon na a no maipapan iti panagsingir ti barangay iti sangaribo a pisos ket saan a mabalin no awan ti inpasa da nga ordinansa wenno resolusyon maipanggep iti daytoy nga addang.
